Mäni - Finanzä
D Carole über dä Manuel:
Dä Manuel - aka Mäni, aka Göggel - eusä "Head of Finance" finsch sicher nöd mit Hemd und Krawatte im Büro sitze. Viel meh erlediget er sini Ufgabe bequem i Boardshorts vom Strand us.. zumindest solang er sini Füess chan stillhalte. Sust finschen sicher scho im Wasser am surfe, e Barrel am sueche. Wenner mal nöd i sim Van voll Surfboards und Sand sis beste läbe irgendwo zwüschet Frankrich und Afrika am gnüsse isch, finschen i de Schwiiz uf de Suechi nach sim nächste Berg-Abentüür - uf Fuess, bim Chlättere oder uf de Skii.
Spontan, optimistisch, und villicht es bizli stuur, meisteret er sis Läbe mit me grosse Herz und unendlicher Energie. Sini liebevolli Lebensart schätzed mir sehr. Und Dank sim charm schaffed mers au z ignoriere wenner mal wider euses Esse wegisst, ohni dassers selber überhaupt merkt. Wenn mer so drüber nahdenkt isches eigentlich zimmli beeidruckend dasser immerno es sixpack het. ;)
Carolex - Produktmanagerin
D Nicole über d Carole:
Meet Carole
Üsi kreativi Powerfrau us Rapperswil. Wenn’d es neus Lieblingsstück idä Händ hesch, het sie’s usgsuecht, kreeiert und nebedbii na paar wildi scribbles ih ihres Büechli gmalt. Surfä, Skatä, Chletterä, Bikä - D Carole isch eigentlich immer dusse zfinde. Miteme Architektur-Studium im Sack, baut sie eus nöd nur e cooli Brand sondern s’ganze Fundament dezue! Ersti Ihdruck: eher ruhig, elegant, es bizzli schüch. Zweiti Ihdruck: die lustigsti Person im Ruum, wo random Sprüch usäjättet, wo dich Tage später immerno zum Lachä bringet. Und wenn sie eis, zwei Drinks intus het, seged mer so: es wird lebendig
Was mir a Ihre liebed? Ihri Loyalität. Ihri Liedeschaft, Ihri Ehrlichkeit und dass uf sie immer Verlass isch. Egal ob mer en letschte Schliff für Kollektion bruchet oder öper, wo üs dra erinneret «hey, mir schaffet das!» Carole macht nöd nur Produkt. Sie macht usere Idee es Erlebnis und userä Brand ä Community.
Pieper - Logistik
Dä Manuel über dä Phillip:
Meet Philipp aka Pipo!
Üses Organisationstalent, üse Pöstler und üse Fels i de
Brandig! Wenn weder mou ergendwo es Chaos usbricht, en Termin verrütscht oder öper weder e kreativi Kurve statt die grade Linie gnoh hed…de Pipo bringt üs zrugg i d’Spur. Mitere Struktur wo scho fast meditativ isch hebt er s'Team
gschmeidig am laufe.
Wie sis Sportstudium scho Pris ged, isch Sport meh als es Hobby für Ihn. Und genau die Energie bringt er ih sini zwöit Rolle bi O’shore. Wenn du aso es Päckli vo üs i de Hand hesch, stönd d’Chance sehr gued dass de Pipo s persönlich vom Estrich im 5 Stock zur Post treid hed. Meistens metm Lächle und oft nochere Bergtour, Schwimme oder es Mätchli Beachvolley. Im Winter ischer denn eher de Typ Ma wo nöi Linie uf unverfahreni Häng zauberet. Hauptsach was dosse und hauptsach in Bewegig und egal was mer vor hed, de Pipo isch eigentli immer debi!
Was mer an ihm bsondrigs liebet? Sini Klarheit, sini Loyalität und sini tüfi Glasseheit. De Pipo bringt ned nor Ordnig is Chaos sondern Drive i d Mission und ab und zue en unerwartete Sproch wo alli zumene
Lächle bringt!
Jämmer - content creator
Dä Philipp über d Nicole:
D' Nicole - aka Nici oder eifach the Jämmer.
Eusi Action Filmmakerin und Fotografin verzauberet d'Website und s Insta ine Bühne voll mit Herz, Farbe und Kreativität. Aber ned nur eusem Content verleiht sie puuri Lebenslust, sondern allne Mensche i ihrere Umgäbig.
D'nici strahlt so e asteckendi Fröhlichkeit und Liechtigkeit us, dass mit ihre im Team eifach immer cool und lustig isch. So nebedbi begeisteret sie au no Lüt für uf d' Ski, is Yoga und natürli für die beste Drinks uf de Welt. Hauptbruflich isch sie aber eidg. dipl. Weltebummlerin mit dur Fernweh.
Watch out - The Jämmer isch überall.
Mit ihrem lideschaftliche Ahtrieb, ihrem Abentürgeist und ihrer Lust, ständig Neus uszprobiere, isch d'Nici euse zuverlässigi Impuls für frischi, muetigi und amigs au zimli usgfallni Idee.
Mir sind sehr gspannt, was no alles chunt. :)
The Jamm
Nachhaltigkeit
Ä nachhaltigi Prodktion liit ois am Herzä. Drum sind eusi Shirts vo Stanley/ Stella - en Hersteller, wo für höchi Qualität, und ächti Nachhaltigkeit staht und einigi Zertifikat mit sich bringt. D T-Shirts bestönd nöd nur zu 100% us Biobaumwulle, sondern sind au no under faire Bedingige produiert worde und sind komplet vegan.
- 100 % Bio-Baumwolle (GOTS-zertifiziert)
- GRS-zertifizierte recycelte Materialien
- OEKO-TEX® Standard 100 – frei von schädlichen Chemikalien
- Fair Wear Foundation – überprüfte faire Arbeitsbedingungen
- PETA-Approved Vegan – komplett ohne tierische Bestandteile