eusi Gschicht
Im Jahr 2020 hend sich de Philipp und de Manuels’erstmou troffe…Beidi zemmli nervös a de Ufnahmeprüefig z Magglinge. Dor es zuefälligs Gespröch und gmeinsams zittere isch en Fründschaft entstande wo über Johre immer tüfer worde isch. Sigs uf unzählige Bergtoure, gmeinsame Surftrips oder teilte WG’s. Ufeme spontane Trip a d’ Westküste hend sich d’Wäg vode Carole und em Philipp/Manuel s erstmal krüzt. Verbondeni Öbige, eis-zwöi Partywaves und vell gueti erläbte Ziit esch au die Fründschaft emmer tüfer worde. Und de einti Surftrip damals isch nur eine vo velne gmeinsame Reise worde.
Zur gliche Ziit uf de andere Siite vo dere Weltchugele, isch d Nicole in Mittel – und Südamerika. De Winter verbringt sie in Davos, de Sommer i de Stallbar in Jona und i de Ziit dezwüsche ergendwo uf Reise diä schöni witi Wält am erkunde! Nebst de Nicole hed au jewils d Carole näbed ihrem Architekturstudium ih de Stallbar gschaffet. Die gmeinsamä Öbe hinter de Bar hed zuenere tüfe Fründschaft gfüehrt. Carole hed ih dere Ziit au scho ihre erstä chlinä Brand gründed, «Offshore Surfboard». Er bildet s Fundament für üsi nöii Idee «O’shore».
Dä Winter in Davos hed au d Nicole und de Philipp zämmebrocht. Denn wie au d’Nicole hed de Philipp ih de Semesterferie in Davos gschaffet. Beidi hend dä geminsami Winter ihde glichä Wohnig verbrocht. Au d Carole hed oft eri Wintertäg in Davos verbrocht. Und de Manuel isch eh nie wiit wäg gsih wenn guete Pulver ahgseid wurde ish, hed mer chönne sicher sie, dass er ufem Sofa wird lande. Langsam aber sicher hend sich die Wäg immer meh mitenand verwebt und mer hend schnell gmerkt dass üs die gliche Inträssene Energie schänked. Sig das Täg i de Bärge, am Surfe oder eifach s Läbä in gueter Gsellschaft!
Es isch denn ned nur bim Gspröch am Tisch blobe, sondern mir hend die gemeinsami Ziit au dosse verbrocht. Ob eis, zwöi Skitürli im Winter oder paar Chlättertäg und Surftrips im Summer. Ih dene Täg isch denn au d’Idee ufcho «Offshore» neu zum Läbe z erwecke. Es sötti ned nur en Surfbrand si sondern es setti d Fröid und Verbendig zu de Natur und üsne Liedeschafte usdrücke. Somit hend mer euses neue Projekt «O’shore» gründet. Sigs es Abentüür «Onshore» oder «Offshore» es sett dich überall chönne begleite! Mir freued üs uf die gmeinsami Reis vo «O’shore» und würded es Feedback, Verbesserigsvorschläg, Ahregige oder eifachd Fröid wo ihr mit üs teilet sehr schätze!